माल्दिभ्स द्वारा भुटान पराजित, नेपालले कास्य पदकको लागि माल्दिभ्ससंग खेल्ने

१३ औं दक्षिण एसियाली खेलकुदको पुरुष क्रिकेट अन्तर्गत शनिवार सम्पन्न दोश्रो खेलमा माल्दिभ्सले पहिलो जित दर्ता गर्ने क्रममा भुटानलाई ८ विकेटले पराजित गरेको छ।

टियु मैदान किर्तिपुरमा सम्पन्न खेलमा भुटानले दिएको ११८ रनको लक्ष्य माल्दिभ्सले १५.१ ओभरमा मात्र २ विकेट गुमाएर पुरा गर्यो।

माल्दिभ्सको जितमा उमर एडमले अविजित इनिंग खेल्ने क्रममा सर्वाधिक ३७ रन बनाए । यस्तै एहमद हसनले २९ तथा अज्यान फर्हाथले २२ रन बनाए।

यस अघि टस हारेर ब्याटिंग गरेको भुटानले निर्धारित २० ओभरमा ७ विकेट गुमाएर ११७ रन बनाएको थियो। उसको लागि कप्तान जिग्मे सिंगेले सर्वाधिक ४० रन बनाए भने सोनम तोब्गेले २४ रन तथा थिन्ले जम्त्सोले १९ रन बनाए। माल्दिभ्स बलर इब्राहिम हसनले ३ विकेट लिए।

माल्दिभ्स र नेपाल कास्य पदकको लागि खेल्ने 

प्रतियोगितामा माल्दिभ्सको यो पहिलो जित हो भने भुटानको चौथो हार हो। जित पछि माल्दिभ्स अंकतालिकाको चौथो स्थानमा रहेको छ भने भुटान पाँचौ स्थानमा रह्यो।

अब माल्दिभ्सले कास्य पदकको लागि सोमबार बिहान नेपालसंग प्रतिस्पर्धा गर्नेछ। सोहि दिन दिउसो बंगलादेश यु-२३ र श्रीलंका यु-२३ ले स्वर्ण पदकको लागि खेल्नेछन्।

शनिवारै सम्पन्न खेलमा नेपालले बंगलादेशसंग ४४ रनको हार बेहोरेपछि फाइनल पुग्न असफल भएको हो। बंगलादेश र श्रीलंका हालसम्म अपराजित रहेका छन्। आइतबार हुने एक मात्र खेलमा बंगलादेश र श्रीलंकाले प्रतिस्पर्धा गर्दैछन्।

नेपालले लिग चरणको खेलमा माल्दिभ्सलाई ८४ रनले पराजित गरेको थियो। नेपाल पहिलो खेलमा श्रीलंकासग ६ विकेटले पराजित भएको थियो। दोश्रो खेलमा नेपालले भुटानलाई १४१ रनले पराजित गरेको थियो।