सुरु भयो टिपीएल, सोबले उत्कृस्ट इनिंग खेल्दा पाल्पाली लेजेंड्सको जित

रुपन्देहीको तिलोत्तमा नगरपालिकामा शनिवार देखि तिलोत्तमा प्रिमियर लिगको तेश्रो संस्करण सुरु भएको छ। प्रतियोगिताको उद्घाटन खेलमा पाल्पाली लेजेन्ड्सले सुपर-११ भैरहवालाई ४ विकेटले पराजित गर्यो।

टस हारेर ब्याटिंग गरेको भैरहवाले दिएको १३७ रनको लक्ष्य पाल्पालीले ६ विकेट गुमाएर पुरा गर्यो। जितमा पाल्पालीमा रहेका राष्ट्रिय क्रिकेटर बिक्रम सोबले सर्वाधिक ३६ बलमा ४८ रन तथा सुबेन्दु पाण्डेले १६ बलमा ३२ रनको योगदान दिए। सोबनै प्लेयर अफ द म्याच समेत चुनिए। सुपर-११ बलर राज भण्डारीले ३ तथा शाहब आलमले २ विकेट लिएता पनि जितको लागि प्रयाप्त हुन सकेन।

यस अघि पहिले ब्याटिंग गर्ने क्रममा सुपर-११ भैरहवाले २० ओभरमा ९ विकेट गुमाएर १३६ रन बनाएको थियो। उसको लागि यु-१९ राष्ट्रिय क्रिकेटर रहीसकेका सुशान्त सिंह थापाले ४९ बलमा ५७ रनको योगदान दिएका थिए। यस्तै महेस रानाले १८ र बिशाल बिक्रम केसीले ११ रन बनाए। पाल्पालीका बलर विजय चौधरीले ३ तथा सुरेश गोदारले २ विकेट लिए।

प्रतियोगिता अन्तर्गत आइतबार तिनाउ टाईटन्सले रेन्बो ज्ञानोदय गोल्ड्सको तथा दोश्रो खेलमा सियारी राइनोजले पाल्पाली लेजेन्ड्सको सामना गर्नेछ।

तिलोत्तमा क्रिकेट बिकास समितिको आयोजनामा संचालित प्रतियोगिताको प्रदेश नम्बर ५ का सामाजिक बिकास मन्त्री सुदर्शन बरालले शनिबार बिहान उद्घाटन गरेका थिए ।

प्रतियोगितामा कुल १० टिमले सहभागिता जनाएका छन्। प्रतियोगिताको विजेता टिमले ४ लाख तथा उप-विजेता टिमले २ लाख रुपैयाँ प्राप्त गर्नेछ।