टि-२० ब्लास्ट : डी भिल्लीयर्सले विस्फोटक इनिंग खेल्दा मिडलसेक्सको सहज जित

बिहिबार देखि इंग्ल्याण्डमा सुरु भएको १६ औं संस्करणको टि-२० ब्लास्ट २०१९ प्रतियोगिता अन्तर्गत पहिलो दिनको खेलमा मिडलसेक्स, वर्सेसटरसायर र समरसेटले जित दर्ता गरेका छन्। मिडलसेक्सले एसेक्सलाई ७ विकेटले, वर्सेसटरसायरले नटिंघमसायरलाई २८ रनले तथा समरसेटले ग्लामोर्गनलाई ८ विकेटले पराजित गर्यो।

डी भिल्लीयर्सको विस्फोटक ब्याटिंग 

पुल बि अन्तर्गतकोलर्ड्स मैदानमा सम्पन्न  खेलमा मिडलसेक्सले टस जितेर बलिंग रोजेपछि ब्याटिंग गरेको एसेक्सले २० ओभरमा ६ विकेट गुमाएर १६४ रन बनाएको थियो।

नेदरल्याण्डका रायन टेन डोसेथेले एकेक्सको लागि सर्वाधिक ७४ रन बनाएका थिए जुन क्रममा ४६ बलमा ६ चौका र ३ छक्का प्रहार गरे। यस्तै टम वेसलेले ४० रन बनाए। मिडलसेक्स बलर टम हेल्मले ३ तथा नाथन सोटरले २ विकेट लिए। मुजिब उर् रहमान विकेटविहिन ( ४-०-२४-० ) रहे।

Ryan ten Doeschate

लक्ष्य पछ्याउने क्रममा ओपनर पल स्टरलिंग १० तथा निक गबिन्स १२ रन बनाएर आउट भए। त्यसपछि ब्याटिंग गर्न आएका एबि डी भिल्लीयर्सले कप्तान दविड मलानसंग तेश्रो विकेटको लागि १०५ रनको साझेदारी गरे। मलान ४३ रन बनाएर एडम जाम्पाको बलमा क्याच आउट भए।

त्यसपछि डी भिल्लीयर्सले जोन सिम्पसनसंग अविजित २२ रनको साझेदारी गर्दै टिमलाई जितसम्म पुर्याए।

३५ वर्षीय डी भिल्लीयर्सले अविजित ८८ रन बनाए जुन क्रममा मात्र ४३ बलमा ६ वटा छक्का र ५ वटा चौका प्रहार गरे। प्लेयर अफ द म्याच समेत चुनिएका उनले मात्र २८ बलमा अर्धशतक पुरा गरेका थिए।

एसेक्स बलर एडम जाम्पा ( ४-०-३८-१ ) , शेन स्यानटर ( ३-०-२९-१ ) र म्याथु क्विन ( ३-०-२०-१ ) ले १/१ विकेट लिए।

सन् २००३ देखि सुरु भएको प्रतियोगिताको सबैभन्दा सफल टिम लीसेस्टरशायर रहेको छ जसले १६ औं संस्करणसम्म आइपुग्दा ३ पटक उपाधी जितेको छ। यस्तै अघिल्लो संस्करणको उपाधी वर्सेस्टरशायरले जितेको थियो।