Singapore Vs Nepal
Live Score +
Home - समाचार - नेपालको तेश्रो हार, नेपालको सुपर सिक्स पुग्ने यस्तो छ सम्भावना

समाचार

नेपालको तेश्रो हार, नेपालको सुपर सिक्स पुग्ने यस्तो छ सम्भावना

Wicketnepal Staff
Editor
  •  
  •  
  •  
  •  
  •  
  •  

  • विकेटनेपाल, फाल्गुन २६ 

आईसीसी एकदिवसीय बिश्वकप छनौट प्रतियोगिता अन्तर्गत नेपालले लगातार तेश्रो हार बेहोरेको छ। बुलावायो मैदानमा नेपालले टस जितेर पहिले ब्याटिंग गर्दै १९४ रन बनाएपछि १९५ रनको लक्ष्य अफगानिस्तानले ३८.४ ओभरमा ४ विकेट गुमाएर भेटाएको हो। नेपाल यस अघि जिम्बाबे र स्कटल्याण्डसंग पराजित भैसकेको छ। अफगानिस्तानको पनि ४ खेल खेल्दा यो पहिलो जित हो।

हार पछि नेपालको सुपर सिक्स चरण पुग्ने सम्भावना लगभग समाप्त भएको छ । समुह ‘बि’ मा अफगानिस्तान र हंगकंगले १/१ खेल जितेको छ। आजै भइरहेको खेलमा यदी हंगकंगले जिम्बाबेसंग हार बेहोर्ने हो भने अन्तिम खेलमा नेपाल र हंगकंग बीचको खेलले सुपर सिक्समा नेपाल, हंगकंग र अफगानिस्तानमा को सुपर सिक्स पुग्ने निर्णय गर्नेछ।

समुह ‘बि’ मा अफगानिस्तान, हंगकंग र नेपालको अझै पनि सुपर सिक्स पुग्ने झिनो सम्भावना छ। सोमबार नेपालले हंगकंग र जिम्बाबेले स्कटल्याण्डको सामना गर्दैछ। जिम्बाबे र स्कटल्याण्ड सुपर सिक्स पुगीसकेका छन्।

पहिलो खेल अफगानिस्तानले जितेको कारण यदी नेपालले हंगकंगलाई पराजित गरेमा अफगानिस्तान, नेपाल र हंगकंगको १/१ जित हुनेछ र नेट रनरेटको आधारमा एउटा टिम अघि बढ्नेछ। हंगकंगले नेपाललाई पराजित गरेमा हंगकंग २ जितको साथ सुपर सिक्स पुग्नेछ। नेपाल अब सुपर सिक्स प्रवेश गर्न हंगकंगलाई पराजित गरेर मात्रै पुग्नेछैन।

ठुलो अन्तरले हंगकंगलाई पराजित गर्न सके नेपाल नेट रनरेटमा अघि बढ्न सक्छ। नेपालको नेट रनरेट -१.५४६ रहेको छ भने अफगानिस्तानको -०.०३८ त्यसैले यदी नेपालले पहिले ब्याटिंग गर्दै ३०० रन बनायो र हंगकंग ८२ रनमै अलआउट भयो भने नेपाल सुपर सिक्स प्रवेश गर्न सक्छ। यदी नेपालले दोश्रो ब्याटिंग गरेको खण्डमा नेपाललाई झनै मुस्किल हुनेछ। मानौ हंगकंगले १५० रन को लक्ष्य दियो भने नेपालले ४ ओभरमा उक्त लक्ष्य पछ्याउनु पर्नेछ जुन असम्भव जसो हो।

नेपालको ब्याटिंग 

यस अघि नेपालले टस जितेर पहिले ब्याटिंग गर्दै १९४ रन बनाएको थियो।

दिलिप नाथको सट्टा ओपनिंग ब्याटिंग गरेका अनिल साह ७ रनमा आउट भएपछि ज्ञानेन्द मल्ल र पारस खड्काले दोश्रो विकेटको लागि ९२ रनको साझेदारी गर्दै नेपाललाई राम्रो सुरुवात दिलाएका थिए। अनिललाई मुजिब उर् रहमानले आउट गरेका थिए।

Paras Khadka
Paras Khadka

१३/१ को अवस्थाबाट नेपालले १०५ रनको योगफलमा ज्ञानेन्द्र मल्ललाई दोश्रो विकेटको रुपमा गुमाउन पुग्यो। मल्ल २३ रन ९ ६९ बल, २ चौका ) रासिद खानको बलमा एलबिडब्लु धरापमा परे। मल्लको विकेट लगत्तै पारस खड्का पनि आउट भए। १० चौका र १ छक्का मदतले ७५ रनको इनिंग खेलेका पारसलाई मोहम्मद नाबीले लंग अन बाउन्ड्रीमा क्याच आउट गराएका थिए।

पारसको प्रतियोगितामा यो दोश्रो अर्धशतक हो र लिस्ट ‘ए’ क्रिकेटमा आठौँ अर्धशतक पनि हो।

पारसको विकेट पछि पाँचौ नम्बरमा ब्याटिंग गरेका रोहित पौडेल मात्र १ रन ( १३ बल ) बनाएर आउट भए। पाँचौ विकेटको लागि दिपेन्द्र ऐरी र आरिफ शेखले २६ रनको साझेदारी गरेपछि दिपेन्द्र ३२ रन ( ४१ बल, ३ चौका र १ छक्का ) आउट हुनपुगे। दिपेन्द्रलाई पछ्याउदै आरिफ पनि नाबीको शिकार हुन पुगे जसले २३ रनको योगदान दिए।

सोमपाल कामि पनि ९ रनमा नाबीको शिकार भए जसपछि शरद भेसावकर घाइते हुँदा प्रतियोगितामा पहिलो पटक मौका पाएका करन केसी पनि १ छक्का प्रहार गर्दै ६ रन बनाएर शापुर जद्रानको बलमा आउट हुन पुगेका थिए। सन्दिप लामिछाने र ललित राजबंशी खाता नखोली आउट हुँदा बसन्त रेग्मी ९ रनमा अविजित रहे।

४९.५ ओभर ब्याटिंग गरेको नेपालले १९४ रनमा सम्पूर्ण विकेट गुमाउन पुग्यो।

अफगानिस्तानको लागि उत्कृस्ट बलिंग गरेका अफ स्पिनर मोहम्मद नाबीले ४ विकेट लिए जुन क्रममा १० ओभरमा मात्र ३३ रन खर्चिए। रासिद खानले ३ विकेट ( ९.५-१-४५-३ ) तथा  शापुर जद्रानले २ विकेट ( ८-१-३२-२ ) हात पारे। मुजिब उर् रहमानले किफायती बलिंग गर्दै १ विकेट हात पार्न १० ओभरमा मात्र २४ रन खर्चिए।

महत्वपूर्ण खेलमा स्टार ब्याट्सम्यान शरद भेसावकर बिना नेपाली टिम मैदानमा उत्रेको छ। शरद ह्याम्सट्रिन्ग इन्जुरी का कारण आजको खेल गुमाएका हुन्। यस्तै विकेट किपर ब्याट्सम्यान दिलिप नाथलाई आज अन्तिम ११ मा राखिएको छैन। शरद र दिलिपको सट्टा अन्तिम ११ मा करन केसी र अनिल साहले पहिलो पटक मौका पाएका छन्।साहले विकेट किपरको भूमिका समेत निभाउनेछन्।

अफगानिस्तानको ब्याटिंग 

लक्ष्य पछ्याउने क्रममा ओपनिंग ब्याटिंग गर्न आएका रासिद खानलाई २१ रन ( १४ बल, ५ चौका ) को स्कोरमा आउट गर्दै विकेटको खाता खोलेको नेपालले २८/१ को अवस्थाबाट दोश्रो विकेट लिन ६५ रन थप दिनु पर्यो। दोश्रो विकेटको रुपमा सन्दिप लामिछानेले ओपनर जाभेद अहमदीलाई २६ रन ( ५४ बल, १ चौका र १ छक्का ) आउट गरेपछि अफगानिस्तानले ४६ रन बनाएका रहमत शाहको विकेट पनि गुमाउन पुग्यो। रहमतलाई दिपेन्द्र ऐरीले खेलको २६ औं ओभरमा बोल्ड गरेका थिए जसले ७५ बलमा ५ चौका हिर्काए।

रहमतको विकेटपछि मोहम्मद नाबीलाई पनि दिपेन्द्र ऐरीले ३४ रन ( ३२ बल, २ चौका र १ छक्का ) को स्कोरमा आउट गर्दा अफगानिस्तानले ३४ ओभर सकिंदा  १५० रनमा ४ विकेट गुमाउन पुग्यो। त्यसपछि नजीबुल्लाह जद्रानले आक्रामक ब्याटिंग गर्दै अफगानिस्तानलाई सहज जित तर्फ लागेका थिए। जद्रानले अविजित ५२ रन बनाउने क्रममा ४७ बलमा ४ चौका र ३ छक्का प्रहार गरे।

 


  •  
  •  
  •  
  •  
  •  
  •