च्याम्पियन नेपाली टिम आज स्वदेश फर्कदै, दिपेन्द्र र सन्दिप भारत जाने

nepal u19 cricket team
  • विकेटनेपाल, २ असोज 

एसीसी यु-१९ पूर्वी क्षेत्र प्रतियोगिताको उपाधि जितेको नेपाली टिम सोमबार बेलुका स्वदेश फर्किनेछ । टिम ६:५५ बजे बेलुका हिमालय एअरलायन्सको बिमानबाट त्रिभुवन अन्तर्राष्ट्रिय विमानस्थल आगमन गर्नेछ ।

नेपाली टिमसंग कप्तान दिपेन्द्र ऐरी र सन्दिप लामिछाने भने फर्किनेछैनन् । दुवै खेलाडी मलेसियाबाटै भारततर्फ प्रस्थान गर्नेछ । आईसीसी बिश्व क्रिकेट लिग च्याम्पियनसिप अन्तर्गत छैठौं चरणको हंगकंगसंगको खेलको तयारीको लागि नेपाली टिम भारतको चेन्नईमा रहेको छ  ।

नेपाली टिम आइतबार चेन्नई पुगीसकेको छ र  १९ सेप्टेम्बर मंगलबार पहिलो अभ्यास खेल खेल्ने कार्यक्रम रहेको छ ।

नेपालले एसीसी यु-१९ पूर्वी क्षेत्र प्रतियोगिताको उपाधि जित्न हंगकंगलाई फाइनलमा ५ विकेटले तथा सेमीफाइनलमा आयोजक मलेसियालाई १० विकेटले पराजित गरेको थियो ।

प्रतियोगिता जित्दै नेपाली टिम  मलेसियामा नोभेम्बरमा आयोजना हुने यु-१९ एसिया कप खेल्न छनौट भएको छ।

यु-१९ एसिया कपमा एसियाली टेस्ट रास्ट्रहरु खेल्नेछन्। विकेटनेपाललाई प्राप्त जानकारी अनुसार प्रतियोगिता आयोजना गर्ने मलेसिया स्वतः प्रतियोगिता खेल्न छनौट हुनेछ । एसीसी यु-१९ पश्चिम क्षेत्र प्रतियोगिताको बिजेता टिमले पनि यु-१९ एसिया कपमा सहभागिता जनाउन पाउने छ।

नयाँ टेस्ट रास्ट्र अफगानिस्तान सहित कुल ८ टिम प्रतियोगितामा सहभागी हुने जानकारी विकेटनेपाललाई प्राप्त भए पनि एसियन क्रिकेट काउन्सिलले अधिकारीक रुपमा घोषणा भने गरेको छैन । २०१६ डिसेम्बरमा आयोजना भएको यु-१९ एसिया कपमा ८ टोलि सहभागी थिए ।

यो पनि पढ्नुस