भैरहवाबाट खेल्ने भए आईपीएल खेलेका खेलाडी

  • विकेटनेपाल, पौष ४ – मंगलबार

एभरेस्ट प्रिमियर लिग क्रिकेट अन्तर्गत भैरहवा ग्लाडीएटर्सबाट खेल्ने बिदेशी खेलाडीहरु टुंगो लागेको छ ।

प्रतियोगिताको प्रत्येक टिममा ३ जना बिदेशी खेलाडीहरु हुनुपर्ने नियमअनुसार भैरहवाले पनि दुईजना खेलाडीहरुको नाम घोषणा गरेको छ तर तेस्रो खेलाडीबारे भने हालसम्म जानकारी प्राप्त भएको छैन । ति दुवै खेलाडीहरु पुनित मेहरापुनित बिस्ट भारतीय रहेका छन् ।

पुनित मेहराले भारतको दिल्लीबाट सन् २०१० देखि २०११ सम्म लिस्ट ए क्रिकेट खेल्ने गर्दथे भने २०१२ सम्म टी२० क्रिकेट खेलेका थिए । उनि देब्रे हाते ब्याट्सम्यान हुन् भने स्लो लेफ्ट आर्म अर्थोडोक्स बलिंग पनि गर्दछन । २९ बर्षीय उनले ६ लिस्ट ए खेलको ५ इनिंगमा ११२ रन बनाएका छन् भने ३ विकेट समेत लिएका छन् ।

त्यस्तै टी२० क्रिकेटमा १२ इनिंगमा ११७ भन्दा माथिको स्ट्राइक रेटमा २१३ रन बनाएका छन् भने ८ इनिंगमा ५ विकेट समेत हात पारेका छन् ।

पुनित बिस्टले घरेलु क्रिकेटमा दिल्ली तथा जम्मु कश्मिरबाट प्रथम श्रेणीको क्रिकेट खेल्ने गर्दछन भने सन् २०१२ को आइपिएल क्रिकेटमा दिल्ली डेयरडेभिल्सबाट पनि खेलिसकेका छन् । सन् २००६ मा दिल्लीबाट प्रथम श्रेणीको क्रिकेट खेल्न सुरु गरेका बिस्टले अहिले जम्मु कश्मिरबाट खेल जीवन अगाडी बढाइरहेका छन् ।

विकेटकिपरको भूमिकामा खेल्ने ३१ बर्षीय बिस्टले ७७ प्रथम श्रेणी खेलको १०४ इनिंगमा २६७९ रन बनाएका छन् जसमा ५ शतक सहित सर्बाधिक अविजित २२३ रन रहेको छ ।

लिस्ट ए क्रिकेटको ५२ इनिंगमा ३५.२६ को औसतमा १४४६ रन बनाएका छन भने २८ टी२० इनिंगमा १५ को औसतमा ३९० रन बनाएका छन् ।

भैरहवा ग्लाडीएटर्स

शरद भेसावाकर (कप्तान, मार्की खेलाडी), प्रदीप ऐरी, अभिनास बोहरा, भुवन कार्की, कृष्ण कार्की, प्रकाश केसी, रोहित पौडेल, हरि शंकर शाह, आरिफ शेख, दिपेश श्रेष्ठ, भुपेन्द्र थापा