CLICK HERE FOR PLAYER REGISTRATION
ज्योति पाण्डेको आक्रामक अर्धशतक, ललितपुरलाई हराउंदै बिराटनगरको विजयी सुरुवात – WicketNepal

ज्योति पाण्डेको आक्रामक अर्धशतक, ललितपुरलाई हराउंदै बिराटनगरको विजयी सुरुवात

बुधबारबाट सुरु भएको वुमन्स च्याम्पियन्स लिग अन्तर्गत दोश्रो दिनको दोश्रो खेलमा बिराटनगर टाइटन्सले ललितपुर फ़ाल्कन्सलाई ४ विकेटले पराजित गर्यो ।

जितका लागि १२३ रनको लक्ष्य पछ्याएको बिराटनगरलाई जित दिलाउन ओपनर ज्योति पाण्डेले ६५ रनको महत्त्वपूर्ण पारि खेलिन् । यो प्रतियोगिताको दोश्रो अर्धशतक हो । यसअघि आजै सम्पन्न पहिलो खेलमा काठमान्डौकी रुबिना क्षेत्रीले अविजित ८३ रन बनाएकी थिइन् ।

१० चौका र १ छक्काको प्रहार गर्न ४३ बलको सामना गरेकी ज्योतिले पहिलो विकेटको लागि सोनु खड्कासंग ८३ रनको साझेदारी गरेकी थिइन् । ज्योतिले २५ बलमा अर्धशतक पुरा गरेकी थिइन् । सोनु २४ रनमा आउट भईन ।

बिराटनगरले १२ ओभरमा मात्र २ विकेट गुमाएर १०२ रन बनाएको थियो । तर १३ औँ ओभरमा सम्झना खड्काले ३ रन खर्चिदै सरिता मगर र ज्योति पाण्डेलाई आउट गरेपछि बिराटनगर डगमगाएको थियो । लगत्तैको ओभरमा करुणा भण्डारीले पनि मात्र २ रन खर्चिन ।

त्यसपछि १५.१ ओभरसम्म थप २ विकेट गुम्यो । तर १५.४ ओभर र १५.५ ओभरमा अस्मिना कर्माचार्यले लगातार २ चौका प्रहार गर्दै जित दिलाईन ।

प्लेयर अफ द म्याच ज्योति पाण्डे

 

यसअघि किर्तिपुर मैदानमा ब्याटिंग गरेको ललितपुर फ़ाल्कन्सले ७ विकेट गुमाएर १२२ रन बनाएको थियो । अतिरिक्तको रुपमा २३ रन पाएको उसको लागि ममता चौधरीले सर्बाधिक २८ र करुणा भण्डारीले २१ रन बनाए ।

शुक्रबार हुने खेलमा बिराटनगर टाइटन्सले पोखरा पल्टनसंग र ललितपुर फ़ाल्कन्सले चितवन राइनोजसंग प्रतिस्पर्धा गर्नेछन् ।