किशोर महतो पहिलो पटक राष्ट्रिय टोलिमा समावेश, भन्छन्- ‘पाएको मौकाको सदुपयोग गर्नेछु’

Kishor Mahato

काठमाडौं । नेपाली क्रिकेट संघ (क्यान) ले एसीसी ईस्टर्न रिजन पुरुष टी(ट्वान्टी कप क्रिकेटका लागि नेपाली राष्ट्रिय क्रिकेट टिमको घोषणा गरेको छ ।

थाइल्याण्डमा हुने उक्त प्रतियोगिताका लागि शुक्रबार १४ सदस्सीय नेपाली टोलीको घोषणा गरिएको हो । क्यानले १८ सदस्सीय प्रारम्भिक टोलीबाट अन्तिम टोलीको घोषणा गरेको हो ।

ज्ञानेन्द्र मल्लको कप्तानीमा घोषणा गरिएको टिममा किशोर महतो पहिलो पटक टोलीमा अटाएका छन् । उनी राष्ट्रिय टोलीका नियमित सदस्य रोहित पौडेलको स्थानमा टोलीमा अटाएका हुन् ।

तीव्र गतिका बलर किशोर महतो अहिले पहिलो पटक टोलीमा पर्दा निकै उत्साहित देखिन्छन् । उनी आफु टिममा पर्दा निकै खुसी लागेको बताउँछन् ।

मानिस निरन्तरको संघर्षले बलियो बन्छ र आफुले चाहेका हरचिज र देखेका हर सपना पुरा गर्न सक्छ । किशोरलाई पनि अहिले त्यस्तै भईरहेको छ । उनको राष्ट्रिय टिमसम्मको यात्रा पक्कै सहज थिएन । उनले आफुलाई घरेलु क्रिकेट र उमेर समुहमा प्रमाणित गरेपछि अहिले राष्ट्रिय टोलीसम्म आइपुगेका छन् ।

८ वर्षको उमेर देखि क्रिकेट खेल्न थालेका किशोरले सानै बाट राष्ट्रिय टोलीमा पर्ने सपना देखे । उनी निरन्तर घरेलु क्रिकेट र उमेर समुहमा आफुलाई प्रमाणित गरिरहेका छन् । उनले नेपालको राष्ट्रिय टोलीको बन्द प्रशिक्षणमा पनि आफुलाई पुर्याए पनि उनी अन्तिम टोलीमा भने पर्न सकिरहेका थिएनन् । उनी आफुले बन्द प्रशिक्षणमा सोचे जस्तो नगरेको र प्रशिक्षण पनि विविध थरीको हुने भएकाले विगतमा बन्द प्रशिक्षणमा परेपनि राष्ट्रिय टोलीमा नपरेको बताउँछन् ।

उनको घरेलु र उमेर समुहको तथ्यांक राम्रो रहेको छ । किशोरले नेपाली यू-१९ टोलीका लािग पनि खेलिसकेका छन् । उनले आईसीसी यू–१९ विश्वकप एसिया छनौटमा सिंगापुर विरुद्ध खेल्दै उमेर समुहमा डेब्यु गरे । उनले डेब्यु खेलमै २ विकेट हात पारे । त्यसपश्चात् उनले नेपालकै १९ वर्षमुनिको टिमबाट मलेसियामा आयोजना भएको यू–१९ एसिया कप पनि खेले ।

Kishor Mahato after taking wicket
Kishor Mahato

गत सिजनको पोखरा प्रिमिएर लिगमा उनले आफ्नो टोली विराटनगरका लागि पहिलो जीत दिलाउने क्रममा निकै सम्झनलायक प्रदर्शन गरेका थिए । बुटवल ब्लास्टर्स विरुद्ध रोमाञ्चक बनेको खेलको अन्तिम ओभरमा १३ रन आवश्यक रहंदा बिराटनगर टाईटन्सका किशोरले सिद्धान्त लोहनीको विकेट लिंदै मेडन ओभर बलिङ्ग गरेपछि खेल बिराटनगरले आफ्नो पक्षमा पार्यो ।

त्यसपश्चात् पनि किशोरले निकै राम्रा र सम्झनलायक प्रदर्शन गरिरहेका छन् । पोखरा प्रिमिएर लिगको पहिलो संस्करणमा ४ खेलमा ४ विकेट हात पारेका किशोरले दोस्रो संस्करणमा ५ खेलमा १० विकेट हात पारे ।

यस्तै उनले गत संस्करणको प्रधानमन्त्रि एकदिवसीय राष्ट्रिय क्रिकेट प्रतियोगितामा समेत निकै उल्लेख्य प्रदर्शन गरे । गण्डकी प्रदेशबाट खेलेका उनले ४ खेलमा ८ विकेट हात पारे । इनरुवामा सम्पन्न मनमोहन मेमोरिएल एकदिवसीय क्रिकेट प्रतियोगितामा भने उनी २ खेलमै विकेट विहिन रहे ।

आईसीसी विश्वकप लिग २ अन्तर्गत ओमान र अमेरिकासँगको सिरिज अगाडि पोखरामा भएको बन्द प्रशिक्षणमा समेत किशोर परेका थिए । बन्द प्रशिक्षणमा उनले मलेसियासँगको २ खेलमा ४ विकेट हात पारे । दोस्रो खेलमा उनी म्यान अफ द म्याच समेत बने ।

यस्तो छ उनको क्रिकेटको विगत:

किशोर घरका एक्ला छोरा हुन् । आमा माया महतो र बुबा हरि बहादुर महतोका छोरा किशोरले घरमा क्रिकेट खेल्न थाले ।

नवलपुरमा जन्मिएका किशोरले क्रिकेट सिक्न सुरुमा कुनै एकेडेमी जोइन गरेनन् । उनी घरतिरै साथीहरुसँग क्रिकेट खेल्दै गर्दा क्रिकेटमा चाख बढ्न सुरु भयो र उनी घरका आफ्नै साथीहरुसंग क्रिकेट खेल्दै सिक्न थाले।

पछि उनले चितवनमा चितवन क्रिकेट एकेडेमीमा राजु खड्कासँग प्रशिक्षण लिए । उनलाई क्रिकेट खेल्न दिपेश श्रेष्ठ, आकाश थापा र संगर्ष पौडेलले सहयोग गरे।

किशोरलाई क्रिकेट खेल्दा घरबाट कुनै दवाव आउँदैनथ्यो । उल्टै क्रिकेट खेल्न घरबाट नै प्रेरणा पाउने गर्थे । ‘मलाई घरमा क्रिकेट नखेल भनेर कुनै दवाव आउँदैनथ्यो, बरु उल्टै साथ र सहयोग गर्नुभयो ।’ किशोरले बताए ।

आज उनी राष्ट्रिय टोलीसम्म पर्नुको श्रेय केबल आफ्नो परिवार र सिकाउने दाइहरुलाई दिन्छन् । ‘मलाई क्रिकेट खेल्न साथ दिने आमा बुबा र सिकाउने दाइहरु बाहेक कसलाई धन्यवाद भन्न सक्छु र ?’ किशोरले प्रश्न गरे ।

किशोर सानै बाट नेपाली क्रिकेट पनि फलो गर्थे । उनलाई सबै खेलाडी मनपर्ने र सबै आफ्ना आइडल रहेको किशोरले बताए । ‘मलाई नेपाली खेलाडी सबै मन पर्नुहुन्छ, किनकि सबैले राष्ट्रिय टिमको सेवा गर्नुभएको छ ।’ किशोर भन्छन्,‘त्यसैले मलाई सबै खेलाडी मन पर्नुहुन्छ र सबैलाई म सम्मान पनि गर्छु ।’

Kishor Mahato bowling
Kishor Mahato bowling

किशोरले आगामी दिनमा नेपाली राष्ट्रिय टिमलाई जतिसक्दो सेवा गर्न चाहन्छन् । उनी देशका लागि धेरै खेल्न चाहन्छन् । तापनि उनले कुनै महत्ताकांक्षी सपना भने देखेका छैनन् । उनी भन्छन्, ‘नेपालका लागि जतिसक्दो राम्रो खेल्न चाहन्छु तर निकै ठुला ठुला सपना देखेको छैन, भविष्यको निर्धारण भविष्यले नै गर्नेछ, पाएको मौकामा राम्रो गर्नेछु ।’

नेपालसहित सिंगापुर, हङकङ, मलेसिया, भुटान र म्यानमार सम्मिलित एसीसी ईस्टर्न रिजन टि-२० प्रतियोगिता फेब्रुअरी २९ देखि मार्च ६ सम्म थाईल्याण्डमा हुनेछ । यस प्रतियोगिताका लागि किशोरले पहिलो पटक नेपाली राष्ट्रिय टिममा स्थान बनाएका छन् । उनले पाएको मौकाको सही सदुपयोग गर्नेमा सबै नेपाली क्रिकेट समर्थक आशावादी छन् ।

एसीसी ईस्टर्न रिजन टि-२० को लागि नेपाली टिम 

ज्ञानेन्द्र मल्ल (कप्तान), दीपेन्द्र सिंह ऐरी (उप-कप्तान), पारस खड्का, विनोद भण्डारी, आरिफ शेख, करन केसी, सन्दीप लामिछाने, अभिनाश बोहोरा, कुशल मल्ल, सुशन भारी, पवन सरार्फ, सन्दीप जोरा, भुवन कार्की,  किशोर महतो