एनसीएल महिला टि–२० क्रिकेट बैशाख ७ बाट, रेखा थापा बनिन् टिम मालिक

  • विकेटनेपाल – ५ चैत्र, मंगलवार

एनसीएल स्पोर्टस प्रालिको आयोजनामा हुने प्रथम महिला टि–२० क्रिकेट लिग प्रतियोगिताको विजेताले १० लाख पुरस्कार पाउने भएको छ।

आगामी वैशाख ७ देखि १४ गतेसम्म संचालन हुने उक्त प्रतियोगिताको उपविजेताले रु ५ लाख पुरस्कार पाउने सोमबार आयोजित पत्रकार सम्मेलनमा आयोजक प्रालिका प्रबन्ध निर्देशक जयराज रायले जानकारी दिए । त्यस्तै प्रतियोगिताको प्लेयर अफ दि म्याचले १० हजार र विधागततर्फ उत्कृष्ट हुने खेलाडीलाई समेत पुरस्कार प्रदान गर्ने आयोजकले जनाएको छ।

प्रतियोगितामा भैरहवा क्विन्स, विराटनगर रोअरिङ लायोनेस, काठमाडौं सुपर च्याम्पियन र धनगढी वण्डर वुमनले प्रतिस्पर्धा गर्नेछन् ।

Nery Thapa, Sita Rana Magar, Karuna Bhandari, Rubina Chhetry ( From Left to Right )
Nery Thapa, Sita Rana Magar, Karuna Bhandari, Rubina Chhetry ( From Left to Right )

यस्तै प्रतियोगिताको चार टोलीको मार्की खेलाडी समेत घोषणा गरिएको छ। भैरहवाको मार्की खेलाडी रुबिना क्षेत्री, विराटनगरका करुणा भण्डारी, धनगढीका सीताराना मगर र काठमाडौँको मार्की खेलाडी नेरी थापा रहेकी छिन्।

सहभागी टोलीका मालिकहरु दीपक सुवेदी र अनिल भण्डारी (भैरहवा क्विन्स), अनुप सक्सेना (विराटनगर रोअरिङ्ग लायोनेस), हरि खनाल (धनगढी वन्डर वोमेन) र नायिका रेखा थापा (काठमाडौ सुपर च्याम्पियन्स) रहेका छन्।

प्रतियोगिताको खेलाडी छनोट गर्न केहि दिनमा नै अक्सना संचालन गरिने समेत आयोजकले जानकारी दिएको छ।  प्रतियोगिताको प्रत्यक्ष प्रसारण एपीवान् टेलिभिजनले गर्नेछ।