राष्ट्रिय टिमको कप्तानबाट पारसको राजिनामा

Paras Khadka

नेपाली राष्ट्रिय टिमका कप्तान पारस खड्काले आफ्नो पदबाट राजिनामा दिएका छन । उनले प्रेस बिज्ञप्ती जारी गर्दै कप्तानी छोडेको जानकारी दिएका हुन्।

उनले नेपाल क्रिकेट संघ क्यानको नयाँ कार्यसमिती बनेको र निलम्बन पनि फुकुवा भएको भन्दै अब नेपाली क्रिकेट नयाँ तरिकाले अगाडी बढ्नुपर्ने बताए । हिजो मात्रै क्यान निलम्बन फुकुवा भएको थियो ।

उनले भनेका छन्, “नेपाल क्रिकेटको निलम्बन हटाइएको छ भनेर थाहा पाउँदा खुशी लाग्यो र नयाँ कार्यसमिती लाई क्रिकेट, खेलाडी र यसका सरोकारवालाहरुको पक्षमा कार्य गर्न सफलताको शुभकामना दिन चाहन्छु । ”

“अब नेपाली क्रिकेट लाई अगाडी बढाउन नयाँ सुरुवात र सबैसँग प्रतिबद्ध दृष्टिकोण हुनुपर्छ, त्यसैले मैले कप्तानी बाट राजिनामा दिने निर्णय गरे।” उनले थपे ।

२००४ मा सिनियर टिमबाट डेब्यू गरेका उनले २००९ मा राष्ट्रिय टिमको कप्तानी सम्हालेका थिए । उनको कप्तानीमा नेपालले २०१३ मा टी-ट्वान्टी विश्वकप छनोट, २०१४ मा टी-ट्वान्टी विश्वकप खेल्यो भने २०१८ मा एकदिवसीय मान्यता पायो ।

कप्तान पद छाडेपनि पारसले अझै केही समय राष्ट्रिय टिमबाट भने खेल्नेछन् ।