ग्लोबल टि-२० : वर्षाले दुवै खेल रद्द, आज सन्दिपको टिमलाई गर या मरको अवस्था

ग्लोबल टि-२० लिगको दोश्रो चरण अन्तर्गत मंगलबार रातिको दुवै वर्षाको कारण नतिजाविहिन टुंगिएको छ।

सोमपालको टिम विन्नीपेग हक्स र भानकुभर नाइट्स तथा ब्राम्पटन वुल्भ्स र एडमोन्टन रोयल्स बीचको खेल सम्भव नभए पछि ४ वटै टिमले १/१ अंक बाँडेका छन्। १ अंक पाएपछि सोमपालको टिम विन्नीपेग हक्स तेश्रो स्थानमा उक्लेको छ भने सन्दिपको टिम टोरोन्टो भने १ स्थान तल झर्दै पाँचौ स्थानमा पुगेको छ।

अब आज हुने दोश्रो चरणको अन्तिम खेलमा टोरोन्टोले मोन्टरियल टाइगर्सलाई पराजित गरे उत्कृस्ट-४ हुँदै प्ले-अफ चरण प्रवेश गर्नेछ। ब्राम्पटन र भानकुभर प्ले-अफ चरण प्रवेश गरिसकेका छन् भने विन्नीपेग पुग्नको लागि टोरोन्टो र मोन्टरियलको खेलको नतिजा आए मात्रै पुग्छ।

टोरोन्टो नेसनल्स र मोन्टरियल टाइगर्स बीचको खेल बुधबार राति १०:१५ बजे खेलिनेछ। यस अघि लिग चरणमा पनि टोरोन्टो र मोन्टरियल आमनेसम्मने भएका थिए जसमा टोरोन्टो ४ विकेटले विजयी भएको थियो।

अंकतालिका 

प्ले-अफ चरणको खेलमा बिहिबार देखि सुरु हुनेछ। पहिलो क्वालीफायर खेल ब्राम्पटन र भानकुभर बीच बिहिबार राति १०:१५ बजे हुनेछ जसको विजेता फाइनल प्रवेश गर्नेछ। उक्त खेल हार्ने टिमले बिहिबारनै हुने तेश्रो र चौथो बीचको इलिमीनेटरको विजेतासंग शनिवार खेल्नेछ। फाइनल खेल आइतबार खेलिनेछ। प्रतियोगिताको गत संस्करणको उपाधि भानकुभरले जितेको थियो।


प्रतियोगितामा नेपाली स्पिनर सन्दिप लामिछानेले २ तथा सोमपाल कामिले १ खेल खेलेका छन्। सन्दिपले २ खेलमा २ विकेट लिएका छन् भने सोमपाल विकेटविहिन रहेका थिए। सोमपालले एनमोन्टन बिरुद्ध खेलमा २ ओभरमा ३३ रन खर्चे पनि विकेट लिन सकेका थिएनन्। सन्दिपले आफ्नो पहिलो खेलमा ब्राम्पटन बिरुद्ध १ विकेट लिन ४४ रन खर्चेका थिए भने दोश्रो खेलमा राम्रो पुनरागमन गर्ने क्रममा उनले मोन्टरियल बिरुद्ध २८ रन खर्चेर १ विकेट लिए।