रोहित शर्माले बनाए दोहोरो शतक, भारत बलियो स्थितिमा



दक्षिण अफ्रीका बिरुद्दको तेस्रो तथा अन्तिम टेस्टमा भारतका ओपनर ब्याट्सम्यान रोहित शर्माले दोहोरो शतक बनाएका छन् । उनको दोहोरो शतकसंगै भारत बलियो स्थितिमा देखिएको छ ।

यसअघि भएका दुवै टेस्टमा जित निकालेको भारतले तेस्रो टेस्टमा टस जितेर पहिले ब्याटिंग रोजेको थियो । दोश्रो दिन चलिरहँदा भारतले ६ विकेट गुमाएर ४१७ रनको योगफल तयार पारिसकेको छ ।

एकदिवसीय करियरमा ३ दोहोरो शतक बनाएका रोहितले टेस्टमा पहिलो दोहोरो शतक बनाउनेक्रममा २१७ रन बनाए । २५५ बलमा २८ चौका र ६ छक्का प्रहार गरेका उनि ३७० रनको योगफलमा पाचौं विकेटको रुपमा रबाडाद्वारा आउट भए । रविन्द्र जडेजासंग ४७ रनको साझेदारी गरेपछि २४ रन बनाएर रिद्धिमान शाहपनि आउट भए ।

यसअघि मयंक अग्रवाल १० रन, चेतेश्वर पुजारा शुन्य र विराट कोहली १२ रनमा आउट भएपछी भारत ३९/३ को स्थितिमा पुगेको थियो । त्यसपछि रोहितले अजिंक्या रहानेसंग मिलेर चौथो विकेटको लागि २६७ रनको साझेदारी गरे । रहानेले ११५ रन बनाउन १७ चौका र १ छक्का हाने ।

अहिले क्रिजमा रविन्द्र जडेजा ३२ रन र रविचन्द्रन आश्विन २ रन बनाएर ब्याटिङ्ग गरिरहेका छन् ।

दक्षिण अफ्रिकाका लागि कागीसो रबाडाले ८५ रन खर्चेर ३ विकेट तथा जर्ज लिंडेले २ र एन्रिच नोर्त्जले १ विकेट लिएका छन् ।