ग्राउन्डस्टाफहरुको पिडामा सन्दिपको मलम, १ लाख रुपैयाँ सहयोग

कोभीड-१९ महामारीका कारण पिडा परेका त्रिभुवन अन्तर्राष्ट्रिय क्रिकेट मैदानका ग्राउण्डस्टाफहरुलाई सन्दिपले आर्थिक सहयोग गरेका छन्।

करेबियन प्रिमियर लिग खेल्न बिहिबार वेस्टइन्डिज प्रस्थान गर्नु अघि टियु मैदानमा बुधबार बेलुका आयोजित पत्रकार सम्मेलनमार्फत सन्दिपले १ लाख रुपैयाँ दिने घोषणा गरेका हुन्।

टियु मैदानमा १४ जना ग्राउण्डस्टाफहरु रहेका छन् जसले लकडाउनको अवधिमा तलब पाएका छैनन्।लकडाउनको अवधिमा पनि स्टाफहरुले निरन्तर काम गरिरहेका छन्।

“लकडाउनका कारण कति ग्राउण्डस्टाफहरु एकदमै पिडामा हुनुहुन्थ्यो होला। मैले पनि नजिकबाट नियाल्न नपाएता पनि बुझ्दा वहाँहरुले यो अवधिमा तलब पनि रोकिएको हुँदा धेरै नभए पनि स्टाफहरुको लागि सानो सहयोग १ लाख गरेको छु।” सन्दिपले आगामी दिनमा पनि यस्तो सहयोग जारि राख्ने वाचा सामेत गरे।

“धेरै ठुलो रकम हैन तर मेरो हैसियतले त्यति सहयोग गरेको छु। मैदानमा वहाँहरुले सधै काम गर्नु हुन्छ, हाम्रो लागि पिच र ग्राउण्ड तयार गर्नु हुन्छ।” सन्दिपले रकम घोषणा गर्ने क्रममा बताए।

बुधबार टियु मैदानको पिच अवलोकन गर्दै सन्दिप

सन्दिप विहिबार वेस्टइन्डिज प्रस्थान गर्ने 

करेबियन प्रिमियर लिग खेल्न सन्दिप लामिछाने बिहिबार बिहान चार्टर्ड फ्लाइट मार्फत बिहान १० बजे कोरिया प्रस्थान गर्नेछन्। जसपछि अमेरिकाको एटलान्टा हुँदै अगस्ट १ मा सेन्ट लुसिया पुग्नेछन्।

सन्दिपको फ्लाइट मिलाउनको लागि पछिल्लो साता निकै दौडधुप गर्नु परेको थियो। सरकारी स्तरबाट समेत प्रयास भएपछि बुधबार सन्दिपको फ्लाइट पक्का भएको थियो। त्यसअघि सन्दिपले आफ्नो कोरोना जांच गरिसकेका छन् जसको रिपोर्ट नेगेटिभ आएको छ।

यो पनि पढ्नुस :- “लकडाउनमा मानसिक रुपमा आफुलाई बलियो बनाएँ” सन्दिप लामिछाने ( अन्तर्वार्ता )

पछिल्लो सिजन डिफेन्डिङ च्याम्पियन बार्बेडोस ट्राइडेन्टसको लागि सिपिएल खेलेका सन्दिप यो पटक जमैका तल्लावाजबाट खेल्नेछन्। ड्राफ्टमार्फत जमैकाले ९० हजार डलर ( १ करोड ७ लाख नेपाली रुपैयाँ ) खर्चेर टिममा भित्र्याएको थियो। यो पटक सन्दिप मार्की खेलाडीको रुपमा पनि खेल्नेछन्।

वेस्टइन्डिज जानु अघि टियु मैदानमा बुधबार बेलुका सन्दिपले पत्रकार सम्मेलन राखेका थिए।

भिडियो :