वार्नर र बेयरस्टोको कीर्तिमानी ब्याटिंग तथा नबिको उत्कृस्ट बलिंग, हैदराबादसंग बैंगलोर पराजित

  • विकेटनेपाल, चैत-१७ 

ठुला नामहरुले भरिएको तथा भारतीय क्रिकेट टिमका कप्तान बिराट कोहली कप्तानीको रोयल च्यालेन्जर्स बैंगलोरले भारतमा जारि इन्डियन प्रिमियर लिगमा लगातार तेश्रो हार बेहोरेको छ।

हैदराबादको राजिभ गान्धी अन्तर्राष्ट्रिय स्टेडियममा सम्पन्न खेलमा घरेलु टिम हैदराबादले बैंगलोरलाई ११८ रनको विशाल अन्तरले पराजित गरेको हो।

जितसंगै आईपीएल अंकतालिकामा ३ खेलमा २ जित र १ हार बेहोरेको हैदराबाद शिर्षस्थानमा उक्लेको छ। समान हार/जित भए पनि नेट रन-रेटको आधारमा कोलकाता दोश्रो र दिल्ली तेश्रो स्थानमा रहेको छ। बैंगलोर भने तालिकाको तल्लो स्थानमा रहेको छ।

वार्नर र बेयरस्टोको शतक 

खेलमा टस हारेर ब्याटिंग गरेको हैदराबादले २० ओभरमा २ विकेट गुमाएर २३१ रनको योगफल तयार गरेको थियो।

लगातार तेश्रो खेलमा पहिलो विकेटको रुपमा हैदराबादको लागि जोनी बेयरस्टो र डेभिड वार्नरले १८५ रन जोडे। यो आईपीएल इतिहासमै पहिलो विकेटको लागि सर्वाधिक रनको साझेदारी हो । यस अघि यो रेकर्ड गौतम गम्भीर र क्रिस लिनले कोलकाताको लागि खेल्ने क्रममा १८४ रनको साझेदारी गरेपछि रहेको थियो।

१६.२ ओभरमा बेयरस्टो ११४ रन बनाएर आउट हुँदा हैदराबादले १८५ रन बनाईसकेको थियो। बेयरस्टोले मात्र ५६ बलमा ७ छक्का र १२ चौका प्रहार गरे।

बेयरस्टोको विकेटपछि वार्नरले पनि इनिंगको अन्तिम ओभरमा शतक पुरा गरे र १०० रनमा अविजित रहे। ५५ बलमा उनले ५ चौका र समान छक्का प्रहार गरे।

बैंगलोरको लागि १ मात्र विकेट युझभेन्द्र चाहलले लिए जसले ४ ओभरमा ४४ रन खर्चिए।

बैंगलोरको कमजोर ब्याटिंग  

२३२ रनको विशाल लक्ष्य पछ्याउने क्रममा बैंगलोरले कमजोर सुरुवात गर्यो जुन क्रममा पहिलो ६ विकेट ३५ रनमै गुमाउन पुग्यो।

ओपनर पर्थिभ पटेल ११ रन, हेटमेयर ९ रन, ए बि डीभिल्लीयर्स १ रन, बिराट कोहली ३ रन, मोईन अलि २ रन तथा शिभम दुबे ५ रन बनाएर आउट भए।

सातौँ विकेट गुमेपछि कोलिन डी ग्राण्डहोमले ३७ रन बनाएर इनिंग बढाउने प्रयास गरे पनि जित भन्दा बैंगलोर निकै पर रह्यो। १९.५ ओभरमा ११३ रनमा उसले सम्पूर्ण विकेट गुमाउन पुग्यो र ११८ रनको हार बेहोर्यो।

बैंगलोरलाई सस्तोमा समेट्न मोहम्मद नबिले ४ विकेट लिए जुन क्रममा मात्र ११ रन खर्चिए। त्यस क्रममा उनले पर्थिभ पटेल, हेटमेयर, डी भी लियर्स र दुबेलाई आउट गरे। यस्तै सन्दिप शर्माले ३ विकेट लिन ३.५ ओभरमा १९ रन खर्चिए।

( फोटोहरु – आईपीएल )