पहिलो टि-२० मा युएईद्वारा नेदरल्याण्ड पराजित

युएईको नेदरल्याण्ड टुर अन्तर्गत पहिलो टि-२० मा घरेलु टिमलाई युएईले १३ रनले पराजित गरेको छ। ४ वटा टि-२० को सिरिज अन्तर्गत जितसंगै युएईले १-० को अग्रता लिएको छ। दोश्रो टि-२० सोमबार खेलिनेछ।

शनिवार राति भीआरए मैदानमा सम्पन्न खेलमा टस हारेर ब्याटिंग गरेको युएईले २० ओभरमा ५ विकेट गुमाएर १८१ रन बनाएको थियो। लक्ष्य पछ्याउने क्रममा नेदरल्याण्डले २० ओभरमा ४ विकेट गुमयेअर १६८ रन मात्र बनाउन सक्यो।

लक्ष्य पछ्याउने क्रममा डच ओपनर म्याक्स ओडोडले सर्वाधिक ५१ रन ( ३५ बलमा ४ चौका र २ छक्का ) प्रहार गरे। पहिलो विकेटको लागि १८ रन बनाएका स्टेफेन माइबर्गसंग उनले ५४ रनको साझेदारी गरेका थिए। बेन कुपरले ३१, स्कट एडवार्ड्सले ३४ तथा एन्टोनियस स्टालले अविजित १९ रन बनाए पनि टिमलाई जित दिलाउन सकेनन्।

युएईको लागि रोहन मुस्फाताले सर्वाधिक २ विकेट ( ४-०-२६-२ ) लिए। सुल्तान एहमद र जाहुर खानले १/१ विकेट लिए।

युएईको ब्याटिंग 

युएईको लागि ओपनर अश्फाक एहमदले सर्वाधिक ५४ तथा मुहम्मद उस्मानले ५२ रन बनाएका थिए। एहमदले ३५ बलमा ११ चौका प्रहार गरे भने उस्मानले ३४ बलमा ४ चौका र ३ छक्का प्रहार गरे। पहिलो विकेटको लागि रोहन मुस्तफा ( ८ रन ) संग एहमदले ४१ रनको साझेदारी गरेका थिए भने उस्मानले पाँचौ विकेटको लागि डारिएस डी सिल्भा ( २४* ) संग ५६ रनको साझेदारी गरे।

डच बलर भिभिएन किंग्माले २ ( ४-०-४७-२ ) तथा ब्राण्डन ग्लोभर, पिटर सिलर र सिकन्दर जुल्फिकरले १/१ विकेट लिए।

टि-२० अन्तर्राष्ट्रिय वरियतामा नेदरल्याण्ड १३ औं स्थानमा तथा युएई १६ औं स्थानमा रहेको छ। नेपाल ११ औं स्थानमा रहेको छ। यो सिरिज पछि वरियतामा फेरबदल हुनसक्नेछ। युएई र स्कटल्याण्ड अक्टोबरमा युएईमा आयोजना हुने टि-२० विश्वकप ग्लोबल छनौट प्रतियोगितामा सहभागी हुँदैछन्।